КонҲои Балҷувон эҳё мешаванд

Балҷувон, 20 сентябр. (Сулаймон Холов, АМИТ «Ховар»).- Тавре маълум аст, дар ноҳияи Балҷувон конҳои нафту газ зиёданд ва аз сабаби солҳои тӯлонӣ бе назорат мондани ин чоҳҳои дар замони Иттиҳоди шӯравӣ кандашуда, беш аз 90 фисади онҳо имрӯз аз кор баромадаанд.Корхонаи нафтистеҳсолкунандаи «Ҷануб» дар якҷоягӣ бо Ҷамъияти саҳомии шакли пӯшидаи «Ҳасан-компания» барои барқарор кардани чоҳҳо мутахассисони соҳаро ҷалб намуданд. То имрӯз чоҳи рақами 17-и кони «Сулдузӣ» аз таъмири умумӣ бароварда шуда, як қисми аҳолии шаҳри Кӯлобро он бо гази табиӣ таъмин мекунад. Мутахассисони геофизик қабати поёнии чоҳро, ки дар чуқурии 2600 метр ҷойгир аст, маҳкам намуда, барои аз кабати болоии чоҳ гирифтани нафту газ корҳои инфиҷориро давом дода истодаанд. Ба гуфтаи мутахассисони соҳа, дар кони «Сулдузӣ» захираи газу нафт фаровон аст ва баъди зина ба зина барқарор намудани чоҳҳои он, алалхусус чоҳи «марказӣ» (рақами 6), ки таъмираш маблағи зиёдеро талаб мекунад, истифодаи васеи захираи нафту газ дар он имконпазир мегардад.