Пасандозҳои шахсони воқеӣ зиёд шуданд

Душанбе, 25 апрел. (АМИТ «Ховар», Покиза Махмадбекова). - Афзудани пасандозҳо аз баланд шудани эътимод ва боварии аҳолӣ ба низоми бонкӣ шаҳодат медиҳад.

Аз рӯи иттилои хадамоти матбуотии Бонки миллии Тоҷикистон дар ин кор фаъолияти босамари ташкилотҳои қарзӣ ва кафолате, ки Хазинаи суғуртаи пасандозҳои шахсони воқеӣ оид ба ҳимояи ҳуқуқ ва манфиатҳои қонунии пасандоздорон пешниҳод менамояд, нақши калон мебозад.

Бақияи пасандозҳо дар охири моҳи марти соли равон нисбат ба ҳамин давраи соли гузашта 9,6 фоиз афзун гашт.

Тавре ки таҳлили таркиби бақияи ҳаҷми пасандозҳо нишон дод, 35,6 фоиз ё 1 млрд. 769,7 млн. сомониро пасандозҳои шахсони ҳуқуқӣ ва 64,4 фоиз ё 3 млрд. 205,6 млн. сомониро пасандозҳои шахсони воқеӣ ташкил медиҳад.

Аз рӯи иттилои манбаъ, дар моҳҳои январ-марти соли ҷорӣ фоизҳои миёнавазни пасандозҳо бо пули миллӣ 15,12 фоиз ва бо асъори хориҷӣ 9,88 фоизи солонаро ташкил намуданд.